Жиззахда 19 ёшли йигит тақиқланган диний материал тарқатгани учун судланди

Жиззахда Telegram орқали тақиқланган диний мазмундаги материални тарқатган 19 ёшли йигит судланди. Бу ҳақда Олий суд матбуот котиби Азиз Обидов хабар берди.

Маълум қилинишича, йигит ўзининг мобил телефони орқали 2020 йилнинг март ойидан буён Ўзбекистонда фаолияти тақиқланган турли ақидапарастлик ғоялари йўғрилган маълумотлар билан мунтазам равишда танишиб борган. Шундан сўнг 58 нафарга яқин танишлари ва бошқа шахсларни Telegram-каналига қўшиб, унга диний мазмундаги материалларни жойлаштириб, муҳокама қилиб келган.

Суд мажлисида сўроқ қилинганида у қилимишидан пушаймонлиги, тарқатган диний материалнинг мазмунига тушунмаганини билдириб, кечиришларини сўраган. Шунингдек, унинг оилавий шароити, муқаддам судланмагани, маҳалласидан кафолат хати билан мурожаат қилингани инобатга олиниб, уни озодликдан маҳрум қилиш билан боғлиқ бўлмаган жазога ҳукм қилинган.

Йигит Жиноят кодексининг 244-1-моддаси 3-қисми “г” банди (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш)да назарда тутилган жиноятни содир қилганликда айбдор деб топилиб, 3 йил муддатга озодликни чеклаш жазоси тайинланган.