Жиззахдаги ЙПХ масканида Cobalt қочишга уриниб бир нечта машинага шикаст етказди (Видео)

2023 йилнинг 17 январ куни Ғаллаорол туманидаги Сангзор-15 ЙПХ масканида Жиззах вилояти ИИБ Транспортда хавфсизликни таъминлаш бошқармаси Жиноят қидирув бўлими ҳамда ДХХ вилоят бошқармаси ходимлари томонидан тезкор тадбир ўтказилди.

Жиззах вилояти ИИБ ахборот хизмати томонидан эълон қилинган видеолавҳада тадбир давомида давлат рақам белгисисиз ҳаракатланиб келаётган шубҳали оқ рангли Cobalt автомашинаси тўхтатилгани, ҳайдовчи дастлаб машинани ичкаридан қулфлаб олиб, сўнгра одамлар ҳаётига хавф солган ҳолда ҳаракатни кескин давом эттирганини кўриш мумкин.

Бундан ташқари Cobalt қочиш жараёнида ЙПХ масканида тўхтаб турган бир нечта автомашинага шикаст етказди. Аммо шубҳали машина узоққа кета олмай у дарҳол тўхтатилди.

Cobalt холислар иштирокида кўздан кечирилганда 1993 йилда туғилган фуқаро бошқарувидаги автомашина олд қисми ўнг ўриндиғида полиэтилен пакетда 205 грамм оғирликдаги марихуана гиёҳвандлик моддаси борлиги аниқланди.

Ҳолат юзасидан тегишли тартибда ҳужжатлар расмийлаштирилиб терговга қадар текширув ишлари олиб борилмоқда.