Обуна бўлинг

Ҳодисалар    7:51 / 10.08.2022     535

Бахмалда алимент ундириш учун борган МИБ ходими пичоқланди

Ходимларга ҳужум қилган фуқаро маст бўлгани аниқланди.

Жиззах вилояти ИИБ ахборот хизматининг хабар беришича, 2022 йил 5 август куни Бахмал тумани Калтатой қишлоғида ўз хизмат вазифасини бажараётган МИБ ходимларига фуқаролардан бири пичоқ билан ҳамла қилиб, ходимлардан бирига тан жароҳати етказган.

Маълум бўлишича, МИБ Бахмал тумани бўлими ижрочиси 2 нафар ҳамкасби билан “Қутлуғобод” МФЙга қарашли Калтатой қишлоғида яшовчи фуқародан шу қишлоқда яшовчи собиқ турмуш ўртоғининг бир нафар вояга етмаган фарзанди фойдасига 15 миллион сўм алимент пулларини ундириш тўғрисидаги фуқаролик ишлари бўйича Ғаллаорол туман суди ижро ҳужжатига асосан борган.

Хонадон соҳиби маст ҳолатда алимент пулларини бермаслик мақсадида жанжал кўтариб, қўлида бўлган ошхона пичоғи билан хизмат вазифасини бажараётган МИБ ходимининг танасига бир неча маротаба уриб, унга тан жароҳати етказган.

Оқибатда жабрланувчи “қорин бўшлиғининг чап ва пастки қисми, кўкрак қафасининг чап биқин соҳаси ҳамда чап елка соҳаларига санчилиб кирган жароҳати” ташхиси билан туман тиббиёт бирлашмаси шошилинч бўлимига ётқизилган. Кўрсатилган тиббий муолажалар натижасида унинг ҳаёти сақлаб қолинган.

Қайд этилишича, ҳолат юзасидан Жиноят кодексининг тегишли моддалари билан жиноят иши қўзғатилган. Ҳозирда тергов-суриштирув ҳаракатлари олиб борилмоқда.

Сўнгги

Ҳодисалар рукни бўйича мақолалар

error: Узр: Контент ҳимояланган !!