Туркия компанияси Фориш туманидаги Учқулоч руда конига сармоя киритади

Инвестициялар, саноат  ва савдо вазири Лазиз Кудратов ва Туркиянинг Esan Eczacibasi компанияси бош директори Саваш Шаҳин “Жиззах вилоятининг Фориш туманидаги Учқулоч конини ўзлаштириш” лойиҳаси бўйича инвестиция битимини имзолади.

Вазирликнинг маълум қилишича, лойиҳадан кўзланган мақсад – кон-бойитиш мажмуаси ва қўрғошинли маҳсулотларни қайта ишлаш заводини қуриш орқали рангли металллар (рух, қўрғошин, кадмий, висмут, кумуш) ишлаб чиқаришни ташкил этишдан иборат. Бўлиб ўтган музокаралар давомида Ўзбекистонда қўшимча инвестиция лойиҳаларини амалга ошириш масаласи келишиб олинди.

Esan Eczacibasi конларга ишлов бериш ва улардан фойдаланишга ихтисослашган. Компания 40 дан ортиқ карьерларни бошқаради, 8 та хомашёни қайта ишлаш заводига эга. Дунёнинг 40 дан ортиқ мамлакатларида фаолият юритади. Компанияда 2500 га яқин ходим ишлайди.