“Сўғдиёна” 8 нафар футболчи билан шартнома имзолади

Жиззахнинг “Сўғдиёна” футбол жамоаси Суперлига ёзги трансферлар ойнасида ўз таркибини кучайтириш мақсадида бир қатор футболчилар билан шартнома имзолади.

Жумладан, ҳимоячи Абдуллоҳ Омоналиев жиззахликлар таркибига келиб қўшилди. 2005 йилда туғилган Омоналиев “Бунёдкор” ҳамда Ўзбекистон U18 терма жамоаси аъзоси ҳисобланади. Абдуллоҳ Омоналиев “Сўғдиёна” сафида ижара асосида ҳаракат қилади.

Шунингдек, ярим ҳимоячи Оллоберган Каримов Жиззах жамоаси билан расмий шартнома имзоланди. 17 ёшли футболчи жамоага “Бунёдкор” клубидан келиб қўшилди. Каримов 2023 йил биринчи даврада Суперлигада 1та учрашувда майдонга тушиб 1 та голли узатма амалга оширган. Оллоберган Каримов ҳам “Сўғдиёна” сафида ижара асосида майдонда ҳаракат қилади.

Жиззахликлар марказий ярим ҳимоячи Муҳаммад-Сафо Фозилов билан ҳам расмий шартнома имзолади. 2002 йилда таваллуд топган футболчи “Сўғдиёна” “Бунёдкор” жамоасидан келиб қўшилди. Фозилов 2023 йил биринчи даврада Суперлигада 3 та учрашувда майдонга тушиб 1 гол урган. Ўзбекистон кубоги баҳсларида 2 та ўйинда майдонга тушган.

“Бунёдкор”дан яна 3 футболчи “Сўғдиёна” янги аъзосига айланди. Хусусан, марказий ярим ҳимоячи Шоҳрух Муҳсинов, ҳужумчи Улуғбек Кенжаев, Диёр Жалолиддинов жиззахликлар таркибига келиб қўшилди.

Жиззах клуби, шунингдек, 2 нафар легионер билан ҳам шартнома имзолади.  Черногориялик Дамян Радулович ярим ҳимоя чизиғини кучайтиради. 2002 йилда туғилган футболчи “Сўғдиёна”га Чернагориянинг “ОФК Грбал” жамоасидан келиб қўшилди.

Шимолий Македониялик ярим ҳимоячи Люпче Дориев ҳам “Сўғдиёна” жамоаси янги футболчисига айланди. 1995 йилда туғилган футболчи бунга қадар “Шкендия” клубидан келиб қўшилган.